WEB a reuni cu Ombudsman den cuadro di e Rapport “Het Luisterend Oog, in het kaart brengen van instellingen”

April 13, 2026

ORANJESTAD, ARUBA

WEB a reuni cu Ombudsman den cuadro di e Rapport “Het Luisterend Oog, in het kaart brengen van instellingen”

Ombudsman di Aruba, sra. Jurima Bryson, a anuncia cu den cuadro di su rapport, e la inicia contacto cu companianan estatal pa pone enfasis riba e echo cu actualmente ningun di nan tin un sistema di keho cla y accesibel.

Ombudsman a manda un copia di e rapport, incluyendo su recomendacionnan, pa tur compania estatal. ­­­

Segun ley, tur instancia tin e obligacion pa, den un tempo defini, informa Ombudsman con nan lo implementa e recomendacionnan duna.

WEB a tuma contacto cu Ombudsman pa asina revisa e consehonan. Durante un reunion cu WEB, Ombudsman a duna mas splicacion di e rapport, tocante e normanan di conducta apropia y e rekisitonan minimo pa un sistema di keho cu ta garantisa bon servicio na comunidad.

Ombudsman a señala cu WEB ta un instancia vital pa Aruba, mirando su monopolio pero tambe mirando e hecho cu e compania estatal ta provee Aruba cu awa. Awa ta un necesidad basico pa bida y ta algo vital pa por sobrevivi.

Den cuadro di esaki, Ombudsman ta subraya tambe e decision di Corte caminda cu a pone enfasis cu no ta permiti pa corta awa den casnan caminda muchanan menor di edad ta biba.

Ombudsman lo sigui monitor e proceso y ta spera cu e pasonan necesario lo wordo tuma pa mehora e servicionan pa comunidad.

E rapport completo “Het Luisterend Oog – in kader brengen van instellingen”, y tambe e zorgenbrief ta disponibel riba website di Ombudsman, www.ombudsman.aw/pa/publicacion/.

Keda na altura di tur desaroyo

Bureau Ombudsman ta mantene comunidad informa via e siguiente canalnan di comunicacion:

Scroll To Top