BONBINI NA BUREAU OMBUDSMAN
Instancianan cu conducta responsabel, husto y transparante
E Bureau Ombudsman a wordo institui pa por brinda e ciudadano proteccion amplio contra conducta inapropia di instancianan, adicional na otro opcionnan pa busca bo derecho (= otro opcionnan pa entrega keho, por ehempel door di entrega un apelacion serca huez of door di entema un caso administrativo-huridico).
Parlamento ta nombra Ombudsman pa un periodo di 6 aña.
Ombudsman, como institucion independiente y imparcial, tin como tarea pa stimula cu instancianan trata tur hende na un manera apropia y cu derechonan humano ta wordo respeta.
Ombudsman por investiga si un instancia ta trata un y tur den forma apropia basa riba un keho cu wordo entrega of riba propio iniciativa. E evaluacion aki ta wordo ehecuta a base di e normanan di conducta apropia, cu ta publica den e Behoorlijkheidswijzer © di Bureau Ombudsman Aruba.
Un y tur (tur hende) cu ta di opinion cu nan a wordo trata den forma inapropia door di un instancia, por entrega un keho serca Ombudsman.
Den cuadro di e Ley ‘Landsverordening Ombudsman’, ora cu referi na instancianan ta trata aki di organonan administrativo, entidadnan huridico cu gobierno a institui, companianan estatal, organisacionnan priva cu tareanan di interes general y cu ta ricibi placa di gobierno, organisacionnan priva cu ta ehecuta tareanan cu mucha y hoben (tur persona te cu 17 aña) riba tereno di enseñansa, ayudo y guia, cuido, cuido medico y tambe tur e empleadonan di dicho instancianan hasta si e relacion di trabou a termina caba.
Ombudsman ta e unico persona autorisa pa tur locual ta trata contratonan y personan den servicio di Bureau Ombudsman. Esaki ta nifica cu unicamente Ombudsman por cera un contrato laboral, schors of termina un relacion di trabou pa cu Bureau Ombudsman. Ombudsman y su team no ta subordina na un organo.
Ombudsman y Kinderombudsman ta manda un rapport anualmente pa Staten y pa Minister di Asuntonan General y si nan ta constata cu esaki ta necesario, Ombudsman y Kinderombudsman lo manda esaki tambe pa e instancianan di cual nan conducta tawata forma parti di un investigacion.
Staten y e ministernan por haci un apelacion na Ombudsman pa duna conseho encuanto un tema cu ta cay den e area di trabou di Ombudsman of Ombudsman por inicia un investigacion riba propio iniciativa.
