mr. sra. J. Bryson

E prome Ombudsman di Aruba

Mr. sra. J. (Jurima) Bryson a huramenta 1 di october 2024 como e prome Ombudsman di e pais Aruba. Desde 2007 señora J. Bryson a eherce e profesion di abogado na Aruba y desde 2013 e la habri su mesun bufete di abogado. E experiencia den entre otro notarieel recht, abogacia y demas areanan huridico ta un base excelente pa por fungi como Ombudsman.

Mr. sra. J. Bryson a nace, crece y a haci su enseñansa secundario na Aruba, pa despues sigui cu su estudio universitario na Hulanda. E la finalisa su propedeuse den ley y su master den Notarieel recht na Universidad di Leiden. Durante su estudio e la contribui activamente como boluntario na Tienda di Ley na ciudad di Den Haag.

E la fungi den diferente posicionnan den directiva, por ehempel como tesorero di Orden di Abogadonan di Aruba. Tambe e tawata miembro di varios comision. Te cu prome cu e la huramenta como Ombudsman di Aruba, e tawata un miembro activo di e Comision penal di Orden di Abogadonan.

Como e prome Ombudsman di Aruba, e tin e responsabilidad pa forma e instituto nobo di Ombudsman. Cu un dedicacion grandi e lo eherce e tarea aki, cu e meta pa garantisa y boga pa un bon gobernacion, transparente y responsabel.