Mester paga Ombudsman pa por entrega un keho?
Pa por entrega un keho cerca Ombudsman no tin ningun costo envolvi.
Mi mester ta biba na Aruba pa por entrega un keho cerca Ombudsman?
Tur hende por entrega un keho cerca Ombudsman. Y no ta un rekisito cu e hende mester ta biba na Aruba. Por ehempel un turista of un hende indocumenta tambe por entrega un keho.
Mi por entrega un keho si e ta wordo trata door di Corte di Husticia caba?
Si bo caso ta wordo trata den Corte di Husticia, Ombudsman no ta autorisa pa tuma bo keho na e momento ey. Despues di ricibi un decision di Corte di Husticia por entrega un keho na Ombudsman. Ombudsman lo trata e ora ey solamente e parti di ehecucion di e decision cu Corte a dicta caba y no e keho mes.
Ombudsman ta un abogado?
No, Ombudsman ta investiga kehonan riba peticion of propio iniciativa contra instancianan cu ta nombra den ley.
Mi mester ta mayor di edad pa por entrega un keho cerca Ombudsman?
Tur persona por entrega keho cerca Ombudsman, un menor di edad tambe.
Ta posibel pa entrega un keho contra un organisacion priva?
Esaki ta posibel den e siguiente tres casonan, si ta trata di:
- companianan estatal; Tambe por entrega un keho contra un persona cu tin of tawata tin un relacion laboral cu e instancia aki;
- organisacion priva di interes general cu ta ricibi un contribucion financiero di e caha di pais Aruba. Tambe por entrega un keho contra un persona cu tin of tawata tin un relacion laboral cu e instancia aki;
- organisacion priva cu ta encarga cu tareanan pa cu hobennan (tur persona te cu 17 aña) riba tereno di enseñansa, ayudo na mucha y hoben, cuido di mucha y/of cuido medico.
Tambe por entrega un keho contra un persona cu tin of tawata tin un relacion laboral cu e instancia aki.
Si no ta trata di un di casonan manera menciona akiriba, no por entrega un keho contra un instancia priva.
Mi mester a entrega un keho cerca e instancia concerni prome?
Si, pa por entrega un keho cerca Ombudsman, bo mester a entrega bo keho cerca e instancia concerni prome. Si esaki no a sosode ainda, mester haci esaki prome cu por haci uzo di e servicio di Ombudsman.
Pakico Ombudsman ta un institucion independiente y imparcial?
Pa loke ta trata ehercemento di nan tarea, Ombudsman y su team no ta subordina na un organo. E staf ta emplea directamente door di Bureau Ombudsman Aruba.
Con Ombudsman por yudami ora ta trata di un keho contra Corte di Husticia?
Corte ta cay den categoria sub 7 di articulo 1 di Landsverordening Ombudsman (LvO): esta organo, cu a wordo estableci den Staatsregeling of Landsverordening cu ta tuma decision huridico (“rechtspraak”), pero unicamente si ta trata e decision huridico mes.
Esey ta nifica cu Ombudsman no por trata un keho su contenido (“inhoudelijk”) encuanto decisionnan di corte y tur cos cu ta cay bou di e capa ey of un hues.
Tur otro keho si Ombudsman por trata contra dicho instancia.
Kico Ombudsman SI por haci:
- Despues di ricibi un desicion di corte, por entrega un keho na Ombudsman.
- Na e momento ey Ombudsman tin e mandato pa trata unicamente e parti di ehecucion (“uitvoering”) di e decision cu corte a dicta.
Kico Ombudsman NO por haci:
- Ombudsman no por trata e keho mes, e contenido. Conforme ley, Ombudsman no por anula (“overrule”) e decision di corte.
- Ademas, no por entrega un keho contra un hues.
- Ombudsman no por trata tampoco un keho encuanto e periodo cu un caso ta wordo trata (“verwerkingsperiode”).
Una bes bo entrega un peticion na corte, esey ta nifica cu e ta den proceso di wordo trata y desde e momento ey, Ombudsman no por trata ningun keho di e caso aki na ningun manera.
