Ombudsman ta urgi Elmar, SETAR, Web Aruba y Serlimar pa introduci un procedura di keho

March 31, 2026

ORANJESTAD, ARUBA

Ombudsman ta urgi Elmar, SETAR, Web Aruba y Serlimar pa introduci un procedura di keho

Ombudsman di Aruba, mr. sra. Jurima Bryson a publica e rapport “Het Luisterend Oog” (“E wowo cu ta scucha”) 9 di maart 2026. Den e rapport aki a identifica 564 instancia na Aruba, cu ta cay bou di Landsverordening Ombudsman (LvO).

E 4 companianan estatal ta N.V. Elmar, Setar N.V., Web Aruba N.V. y Serlimar Sui Generis, nan tambe ta pertenece na e grupo cu a wordo identifica. Hustamente pasobra ciudadanon y companianan ta depende di e servicionan cu e companianan aki ta ofrece ta importante cu e companianan aki mester traha di tal forma cu pa tur hende ta comprendibel kico nan ta haci, esaki ta inclui tambe nan sistema di atende cu kehonan di cliente.

E rapport “Het Luisterend Oog” ta encera un investigacion haci door di Bureau Ombudsman den e tercer kwartaal di 2025. E meta principal di e investigacion tawata pa identifica e instancianan cu ta cay bou di LvO.

E investigacion ta mustra cu e companianan estatal ta ofrece informacion general di contacto y tin servicio pa cliente, pero un procedura di keho cla y conoci no tin.

Pa e ciudadano ta esencial pa tin bon informacion con un keho por wordo entrega, con e ta wordo trata y den cua termino por spera un reaccion. Un procedura asina ta contribui na confiansa, bon informacion huridico y servicio di calidad.

Ombudsman a manda tur e companianan estatal y e ministernan envolvi un carta tocante esaki, y a solicita pa a corto plaso implementa y publica un procedura di keho cla y accesibel.

“Un bon procedura di keho no ta un formalidad, pero un parti esencial di servicio confiabel pa e ciudadano”, segun e Ombudsman.

Ademas di e recomendacionnan general den e rapport, Ombudsman ta conseha e companianan estatal pa den un tempo cortico tuma algun paso pa:

  • Defini y publica un procedura di keho cla y accesibel (por ehempel via e website of portal pa cliente);
  • Stipula e pasonan, tempo pa procesa, registracion, responsabilidad y feedback;
  • Scoge un persona of punto cla caminda cliente por bay cu nan pregunta of keho;
  • Describi kico cliente por haci si nan no ta satisfecho cu e manera cu nan keho a wordo trata y e tempo cu a tuma pa haci esaki;
  • Defini y publica e condicionnan general, mantene nan actualisa y haci nan facil pa haña;
  • Sigura cu empleadonan ta consciente di kehonan y cu nan ta sigui nan bon, conforme e recomendacionnan den e rapport.

Ademas, mester tin mas claridad tocante con organisacionnan ta funciona y cua leynan ta aplicabel, pa ciudadanonan por compronde miho con nan ta funciona y ken ta responsabel.  Esakinan ta puntonan cu Ombudsman a subraya den e carta di preocupacion cu Ombudsman a manda minister-president Mike Eman na februari 2026.

E rapport completo “Het Luisterend Oog – in kader brengen van instellingen”, y tambe e zorgenbrief ta disponibel riba website di Ombudsman, www.ombudsman.aw/pa/publicacion/.

Ombudsman lo sigui monitorea si su recomendacionnan ta wordo sigui

Keda na altura di tur desaroyo

Bureau Ombudsman ta mantene comunidad informa via e siguiente canalnan di comunicacion:

Scroll To Top