Un charla exitoso di Ombudsmannen di Reino na Universidad di Aruba

ORANJESTAD, ARUBA (16 Januari, 2025) –

Diamars anochi 14 di Januari, un audiencia grandi a atende e charla ‘De rol en betekenis van de Ombudsman’. Durante e charla, e Ombudsmannen di Reino cu ta presente na e encuentro anual na Aruba, a splica publico kico e trabou di Ombudsman ta encera.

E ombudsmannen presente pa e encuentro anual na Aruba ta sr. Reinier van Zutphen, Ombudsman Nacional, sr. Keursly Concincion, Ombudsman di Curaçao y sra. Gwendolien Mossel, Ombudsman di Sint Maarten. Sra. Jurima Bryson, e prome Ombudsman di Aruba, ta anfitrion e aña aki di e encuentro anual di Ombudsmannen di Reino cu pa prome biaha ta tuma lugar na Aruba.

Den un sala completamente yen, publico presente tambe a haya un oportunidad pa haci pregunta na e Ombudsmannen y na e manera aki informa nan mes con e Instituto di Ombudsman ta funciona y kico nan por spera di e Ombudsman, e Defensor di Pueblo.
Ombudsman di Aruba ta agradeci tur hende cu tabata presente na e charla di ayera nochi y kier asegura pueblo cu lo sigui suministra informacion via diferente canalnan di comunicacion.

Ademas, sra. Jurima Bryson ta sumamente agradeci cu e presencia di su colega Ombudsmannan na e charla unda nan tambe por a comparti nan conocemento y experiencia cu publico.

Oficina di Ombudsman Aruba kier informa cu nan lo mantene pueblo na altura di e ultimo desaroyonan y encuanto e apertura oficial di oficina.

Pa por keda na altura di e ultimo desaroyonan, por bishita tambe e paginan di Facebook ‘Ombudsman Aruba’, Instagram ‘ombudsmanaruba’ y LinkedIn ‘Ombudsman Aruba’.