E Presidente di Staten di Aruba a ricibi e Behoorlijkheidswijzer

Den cuadro di e establecimento di Bureau di Ombudsman di Aruba, Staten a ricibi awe un presentacion di Ombudsman, sra. Jurima Bryson encuanto e ultimo desaroyonan. Durante di e presentacion, e miembronan nobo di Staten tambe a haya splicacion tocante e rol y tareanan di Ombudsman. Sra. Bryson a haci uzo di e oportunidad aki pa otorga un copia di e Behoorlijkheidswijzer na Presidente di Staten, sr. Alfred Sneek. Tur miembro di Staten a ricibi tambe un copia digital di esaki.

Bureau di Ombudsman a publica e Behoorlijkheidswijzer riba su paginanan di social media april ultimo. Esaki ta contene e normanan di conducta apropia y ta accesibel online pa un y tur. E normanan di conducta apropia ta importante ora ta evalua e kehonan. Ora un keho wordo entrega na Ombudsman of Ombudsman haci investigacion riba su propio iniciativa, Ombudsman lo evalua si e normanan di conducta apropia a wordo viola.