Banda di promove derecho di mucha y hoben, Kinderombudsman di Aruba tin un tarea independiente cu ta ancra den e Landsverordening Ombudsman (ley).

E tareanan di Kinderombudsman ta pa investiga trato di mucha y hoben door di instancianan, pa informa mucha y hoben encuanto nan derecho, pa supervisa e manera cu kehonan di mucha y hoben of nan representantenan legal ta wordo trata, y pa haci recomendacion pa proteha derechonan di mucha y hoben.

Ademas, e Landsverordening Ombudsman ta dicta cu un y tur por entrega un peticion pa investiga trato di un instancia. Esaki ta nifica cu tambe mucha y hoben por acudi na Kinderombudsman of Ombudsman ora nan ta di opinion cu un instancia no ta trata nan apropia. Por haci tambe un peticion cerca Kinderombudsman verbalmente, despues di cual, si ta desea, Bureau Ombudsman ta pone e peticion riba papel.

Pues muchanan no solamente tin derecho riba papel. Nan tin tambe un institucion independiente unda nan por acudi ora nan ta sinti of ta di opinion cu nan derecho of interesnan no ta wordo respeta suficientemente. Kinderombudsman ta scucha nan storia, ta investiga nan kehonan y ta traha pa sigura cu e bos di muchanan ta wordo scucha.

Talbes hopi hende ta pensa cu derecho di mucha y hoben ta solamente importante ora tin algo ta bay seriamente malo. Esaki no ta asina. Derecho ta trata principalmente cu e bida diario di cada mucha y hoben, por ehempel derecho pa crece den siguridad, pa por bay scol, pa tin salud, pa por hunga, pa por duna su opinion, pa wordo proteha contra violencia y principalmente, pa wordo trata cu respet.

E derechonan aki ta stipula den e Tratado Internacional di Derecho di Mucha (IVRK). Casi tur pais na mundo a acorda pa proteha e derechonan aki. Aruba tambe ta aplica e tratado aki.

Derecho di mucha no ta un fabor ni un premio pa bon comportacion. Nan ta derecho cu cada mucha tin desde nacemento, sin importa su origen, creencia, idioma, limitacion, entrada of status legal.

IVRK ta consisti di 54 articulo. Algun articulo ta describe derechonan concreto, manera riba educacion y cuido di salud. Otro articulonan ta splica cua ta e responsabilidad di gobierno, mayornan y/of e comunidad pa garantisa cu muchanan por desaroya den un ambiente sigu y saludabel.
E Kinderombudsman di Aruba lo dedica e periodo nos dilanti regularmente atencion na diferente articulo di e Tratado Internacional di Derecho di Mucha. Cada biaha lo splica kico un articulo ta nifica y pakico esaki ta importante pa mucha y hoben na Aruba.

Pasobra derecho di mucha no ta solamente un materia pa huristanan of esunnan cu ta traha maneho. Nan ta pa nos tur. Ora muchanan conoce nan derecho y hende grandi ta respeta esaki, nos ta traha hunto pa crea un comunidad den cual cada mucha ta haña e oportunidad pa desaroya su potencial maximo.