The Ombudsmen of the Dutch Kingdom meet in Aruba

ORANJESTAD, ARUBA (13 Januari, 2025) –

E siman aki e Ombudsman di Aruba, sra. mr. Jurima Bryson, ta anfitrion di e encuentro anual di e Ombudsmannen di Reino. Durante e encuentro anual, e Ombudsmannen di Reino ta reuni. Te cu aña pasa october, Korsou, St. Maarten y Hulanda tawata tin nan Ombudsmannen respectivamente. 1 di october 2024 sra. mr. Jurima Bryson a huramenta como e prome Ombudsman di Aruba, y awor pa prome biaha e ta participa na e encuentro anual di e Ombudsmannen di Reino.

E obhetivo di e encuentro anual ta pa dialoga tocante e desaroyonan mas importante pa Reino y relevante pa e trabou di e Ombudsman, e Defensor di Pueblo. E encuentro e aña aki ademas tambe tin como meta pa cera conoci cu e Ombudsman nobo di Aruba. E ombudsmannen lo comparti nan conocemento y experticio cu e Ombudsman nobo. E proposito di e intercambio aki ta pa duna apoyo na e Ombudsman nobo pa por establece e oficina nobo na Aruba. E apoyo aki ta esencial pa e Ombudsman di Aruba cu ta responsabel pa crea e Institucion di Ombudsman. Esaki ta e prome paso y uno importante pa despues e trabou operacional (trato di keho) di e Ombudsman por cuminsa.

Durante e encuentro anual – e aña aki e lo tuma lugar riba dialuna 13, diamars 14 y diaranson 15 di januari 2025 – ademas di e momentonan cu e Ombudsmannen di Reino ta reuni, tambe tin riba programa bishita oficial serca Minister di Finansas y Cultura, Gobernador di Aruba, y un bishita y charla pa publico na Universidad di Aruba.

Aruba ta e ultimo pais den Reino cu a nombra un Ombudsman y esaki definitivamente ta un stap importante. Cu e logro aki e representacion di Ombudsmannen den Reino ta completo.

E encuentro aki no ta solamente marca un capitulo nobo pa nos isla, pero seguramente tambe ta subraya e importancia di colaboracion y intercambio di conocemento entre e Ombudsmannen di Reino. Consecuentemente, e ta un honor pa e Ombudsman di Aruba pa ta anfitrion di un encuentro importante cu ta esun di e Ombudsmannen di Reino.

Sra. mr. Bryson ta honra di por organisa e encuentro historico aki y ta compromete pa hunto cu su colega Ombudsmannen contribui na un Institucion solido y transparante pa tur ciudadano di Reino.

Oficina di Ombudsman Aruba kier informa cu nan lo mantene pueblo na altura di e ultimo desaroyonan y encuanto e apertura oficial di oficina.